Другі Фестываль беларускамоўнай рэкламы і камунікацыі AD.NAK!

Сёлета ў Другога фестывалю беларускамоўнай рэкламы і камунікацыі AD.NAK! асаблівы партнёр. Гэта кампанія “Альтэрнатыўная цыфравая сетка”, якая падтрымала ажно два конкурсы — конкурс на найлепшы беларускамоўны слоган і конкурс на найлепшае беларускамоўнае агучванне рэкламнага роліка.

Пра тое, наколькі важнае месца займае беларуская мова ў беларускай ІТ-індустрыі і чаго кампанія чакае ад падтрыманых ёй конкурсаў, расказвае дырэктар па маркетынгу і інавацыях кампаніі “Альтэрнатыўная цыфравая сетка” Аляксандр Вавула.

— Спадар Аляксандр, наколькі актыўна, на Вашую думку, развіваецца сёння беларускамоўная рэклама?

— Маштаб Фестывалю сведчыць пра тое, што цікавасць да беларускамоўнай рэкламы расце. Аднак у рэальных умовах на рынку яе не хапае. Я маю на ўвазе канкурэнтаздольную рэкламу. Найбольш адметнымі ў гэтым плане з’яўляюцца буйныя замежныя кампаніі, якія робяць адаптацыю арыгінальных тэкстаў на беларускую мову. Айчынныя вытворцы надаюць беларускай мове менш увагі. Хутчэй гэта выклікана асцярожнасцю рэкламадаўцаў. Так, мова зразумелая ўсім, але не ўсімі беларускі тэкст будзе ўспрымацца настолькі хутка, як таго патрабуе рэкламны фармат. Таму ў нас ёсць даволі вялікі сегмент беларускамоўнай аўдыторыі, якая, на жаль, застаецца без увагі. Паколькі гэты сегмент расце, я думаю, вельмі хутка беларускім рэкламадаўцам стане цяжка яго не ўлічваць.

— Наколькі шырока беларуская мова распаўсюджаная ў ІТ-індустрыі?

— Не асабліва шырока. Адразу згадваецца толькі брэнд ZALA са слоганам «Кiруй сваiм тэлебачаннем». Аднак гэты слоган функцыянуе і ў рускім варыянце і, хутчэй за ўсё, з’яўляецца простым перакладам. Таксама не зусім зразумела, навошта ангельская транслітарацыя ў назве пры пазіцыянаванні брэнду як беларускамоўнага. Аб’ектыўна кажучы, назва «Шпаркi Дамавiк» з’яўляецца самым яркім прыкладам выкарыстання беларускай мовы на рынку тэлекамунікацый.

— Адным з конкурсаў, якія падтрымала вашая кампанія сёлета ў межах Фестывалю AD.NAK!, стаў конкурс на найлепшае агучванне замежных рэкламных ролікаў. Як Вы лічыце, ці змогуць яны дзякуючы гэтаму стаць сапраўды бліжэйшымі для беларускіх гледачоў?

— Я думаю, што гэты конкурс, у першую чаргу, дазволіць беларускім спецыялістам атрымаць новы досвед і адтачыць свае прафесійныя навыкі стварэння рэкламных тэкстаў на беларускай мове. Такая практыка нячастая ў штодзённай дзейнасці, і гэты конкурс — выдатная магчымасць для рэкламіста выкарыстаць сваё майстэрства ў працы, якая не застанецца незаўважанай.

Калі казаць пра іншы бок конкурсу, то бок пра саміх гледачоў, я ўпэўнены, што існуе даволі вялікая колькасць людзей, якія хацелі б бачыць ролікі ў перакладзе на родную мову. І гэты конкурс — першы крок насустрач беларускаму спажыўцу. У той жа час мова — гэта ўсяго адзін з мноства культурных аспектаў, якія набліжаюць рэкламу да аўдыторыі. Магчыма, у наступным годзе ёсць сэнс зрабіць яшчэ адзін крок і прадставіць конкурс на найлепшую адаптацыю рэкламнага роліка замежнага брэнду да нашых культурных рэаліяў.

— У «Альтэрнатыўнай цыфравой сеткі» адзін з брэндаў носіць назву «Шпаркі Дамавік». Чаму ён так называецца?

— Большасць беларускіх брэндаў на рынку тэлекамунікацый маюць даволі аднатыпныя назвы: часцей за ўсё гэта абрэвіятуры на ангельскай альбо рускай мовах. Калі мы стваралі наш брэнд, мы хацелі даць яму назву, якая б істотна адрознівалася ад астатніх і выклікала б моцныя эмоцыі. Больш за тое, мы не проста падабралі прыгожыя словы, мы апісалі характар нашага брэнду і падкрэслілі асноўныя якасці прадукту. «Шпаркi Дамавiк» — гэта хуткасны інтэрнэт для хатніх карыстальнікаў.

Таксама трэба адзначыць, што выбар гэтай міфічнай істоты невыпадковы. Дамавік — персанаж, вельмі ўласцівы беларускай культуры, які вядомы ўсім з ранняга дзяцінства і які выклікае шэраг станоўчых асацыяцый з хатняй утульнасцю. А лёгкі і зручны доступ у інтэрнэт — гэта істотны ўнёсак у тое адчуванне камфорту, якое кожны чалавек хоча мець у сябе дома.

— У другім конкурсе, які падтрымала вашая кампанія, ад удзельнікаў патрабуецца стварыць слоган для «Шпаркага Дамавіка». Які слоган быў бы для Вас ідэальным, і чаго б Вы не хацелі бачыць у слогане?

— Мы будзем шукаць такі слоган, які ў лаканічнай і звонкай форме зможа максімальна адлюстраваць характар брэнду. Ён дакладна павінен быць накіраваным на моладзь і ўвабраць у сябе ўвесь запал энергіі, уласцівы сучасным маладым людзям. Усе асноўныя патрабаванні ўжо апісаныя ва ўмовах конкурсу. Асобна варта нагадаць канкурсантам пра ўважлівы падыход да выкарыстання лексічных сродкаў і падбору такіх словаў, якія не толькі па значэнні, але і па фізічных характарыстыках, г.зн. напісанні, гарманіравалі б з назвай брэнду. Аўтарам варта выкарыстоўваць перавагі беларускай мовы, а менавіта яе меладычнасць, і надаваць асаблівую ўвагу фанетычным прыёмам. Хацелася б бачыць прафесійны падыход да справы, каб слоган на беларускай мове быў аўтэнтычным, быў адразу прыдуманы на беларускай мове, а не калькаваўся з рускай.

— Сёлета ў межах Фестывалю AD.NAK! будзе ўручацца антыпрэмія «Каша сувораўская». Яе атрымаюць удзельнікі, якія дашлюць рэкламныя працы, створаныя насуперак гістарычнай логіцы і правілам рэкламнай справы. Як Вы лічыце, ці дапаможа гэты конкурс падвысіць прафесіяналізм беларускіх рэкламістаў?

— Эфект ад антыпрэміі будзе. Я лічу, для таго, каб атрымаць рэальныя вынікі ад правядзення Фестывалю, неабходна не толькі ўзнагароджваць самыя ўдалыя працы, але і даносіць да канкурсантаў іх памылкі. Наколькі я разумею, сутнасць конкурсу не ў тым, каб рабіць “шэдэўры” смеху вартымі, а ў тым, каб паказаць удзельнікам Фестывалю, як рабіць не трэба, і прывесці аргументаваную крытыку. Антыпрэмія — гэта неабходная мера, калі мы хочам, каб узровень прафесіяналізму рос. Я ўпэўнены, што менавіта гэты конкурс выкліча вялізную цікавасць не толькі сярод саміх рэкламістаў, але і сярод гледачоў і гасцей Фестывалю.

— У межах сёлетняга Фестывалю асаблівая ўвага будзе надавацца культурніцкім праектам. Як Вы лічыце, ці дастаткова ўвагі надаецца ў Беларусі прамоцыі менавіта такіх праектаў і мерапрыемстваў?

— Недастаткова. Маё меркаванне: арганізатары Фестывалю зрабілі правільны акцэнт на праблеме малой прысутнасці на рынку менавіта культурных праектаў. Нашая кампанія і сама ўдзельнічала ў падтрымцы культурных мерапрыемстваў, напрыклад, мы выступалі партнёрам адкрыцця галерэі сучаснага мастацтва. На маю думку, найбліжэйшым часам тэмпы развіцця культурнага сектару павінныя вырасці, і хочацца спадзявацца, што менавіта гэты Фестываль стане пэўным штуршком да развіцця.